പെട്ടെന്ന് പ്രായമാകുന്നത് ഏത് വയസിലാണെന്നറിയുമോ? ശരീരത്തിലെ തന്മാത്രകൾക്കും പറയാനുണ്ട്!

പെട്ടെന്ന് നിങ്ങൾ ശരീരത്തിലേക്ക് നോക്കുമ്പോൾ ചുളിവുകളും കുരുക്കളുമൊക്കെ കാണുമ്പോൾ വിചാരിക്കില്ലേ ഇതെന്താ ഇപ്പോൾ ഇങ്ങനൊരു മാറ്റമെന്ന്.. രാത്രി ഇരുട്ടിവെളുത്തപ്പോൾ പ്രായമായിപോയോ വയസായോ എന്നൊക്കെയുള്ള ചോദ്യങ്ങൾക്ക് ശാസ്ത്രീയമായ വിശദീകരണം നൽകുകയാണ് ഗവേഷകർ. പതിയെ പതിയെ അല്ല ശരീരം പ്രായമാകുന്നത്. സാൻഫോർഡ് സർവകലാശാലയിൽ 2024ൽ നടന്ന പഠനം പറയുന്നത്, 44 വയസിനിടയിലും 60 വയസിനിടയിലുമാണ് ശരീരം പ്രായമാകുന്നതെന്നാണ്.

ശരീരത്തിലെ ഏകദേശം 11,000 തന്മാത്രകളിൽ നടത്തിയ സൂക്ഷമമായ പഠനത്തിലൂടെയാണ് ഈ നിഗമനത്തിലെത്തിയത്. 81 ശതമാനം തന്മാത്രകളിലും ഈ പ്രായത്തിൽ വലിയ മാറ്റങ്ങൾ സംഭവിക്കുമെന്നാണ് ഗവേഷകർ മനസിലാക്കിയിരിക്കുന്നത്. ബയോളജിക്കൽ പ്രായം പ്രോട്ടീനുകളിലും ജീൻ പ്രവർത്തനങ്ങളിലും മെറ്റബോളിസത്തിലും അടക്കം വ്യത്യാസങ്ങൾ പ്രതിഫലിപ്പിക്കും. എല്ലാവർഷവും നമ്മൾ ബർത്ത്‌ഡേ ആഘോഷിക്കുന്ന ക്രോണോളജിക്കൽ വയസുമായി ബയോളജിക്കൽ പ്രായത്തിനുള്ള വ്യത്യാസവും ഇതു തന്നെയാണ്. ഇത്തരത്തിൽ പ്രായമാകുന്നതിന്റെ ലക്ഷണങ്ങളാണ് നാൽപതിനും അറുപതിനും ശേഷമുണ്ടാകുന്ന ഗുരുതരമായ ആരോഗ്യ പ്രശ്‌നങ്ങൾ. ശരീരത്തിലെ മാറ്റങ്ങൾ മനസിലാക്കാൻ ഏഴ് വർഷത്തോളം, ഓരോ മൂന്നു മുതൽ ആറു മാസം വരെ 25നും 72നും ഇടയിൽ പ്രായമുള്ള 108 പേരുടെ രക്തസാമ്പിളുകളാണ് പഠനത്തിന് വിധേയമാക്കിയത്.

44 നും 60 നും ഇടയിൽ ഹൃദയാരോഗ്യ ഘടകങ്ങളിൽ മാറ്റം സംഭവിച്ചതായി മനസിലാക്കാൻ കഴിഞ്ഞു. മാത്രമല്ല ഈ പ്രായത്തിലുള്ളവരുടെ രക്തത്തിൽ അതിരോസ്‌ക്ലീറോസിസിന് കാരണമാകുന്ന പ്രോട്ടീന്റെ അളവിലും വർധനവുണ്ടായി. മാത്രമല്ല ഈ പ്രായത്തിൽ ചീത്ത കൊളസ്‌ട്രോൾ കുറയ്ക്കുന്ന അൺസാച്ചുറേറ്റഡ് ഫാറ്റി ആസിഡുകൾ ഉത്പാദിപ്പിക്കാനുള്ള ശരീരത്തിന്റെ കഴിവും കുറഞ്ഞതായി മനസിലായി. ജീവിതശൈലിയിൽ ഉൾപ്പെട്ട ഡയറ്റ്, വ്യായാമം എന്നിവ ഈ പഠനത്തിൽ പരിശോധിച്ചിട്ടില്ല, അതിനാൽ എന്ത് കൊണ്ടാണ് ഈ പ്രായത്തിൽ ഇങ്ങനെ മാറ്റം വരുന്നത് എന്നതിനെ കുറിച്ച് ഗവേഷകർക്ക് ഉറപ്പിച്ച് പറയാനും കഴിയുന്നില്ല.Content Highlights: Body ages Faster at 44 and 60 says study